2.
www
(04.06.2008 12:39)
0  
“Жавароначкі”
5 чэрвеня а 19.00 ў малай зале КЗ “Мінск” этна-гурт “Джамбібум” прэзентуе свой другі альбом “Жавароначкі”.
На прэзентацыі плануецца выступленне гуртоў “Рацыянальная дыета”, “Гаротніца”, “Energy”, выканаўцаў Карэна Карапецяна, Массуда Талібані, Лёні Паўлёнка з “Нагуаль” і іншых цікавых музыкаў.
Іх творчасць блізкая “Джамбібуму” не па стылі грання, а па энергетыцы, якая ўласціва альбому “Жавароначкі”. Вечарына – дадатковая магчымасьць паслухаць не толькі музыку, якую стварае гурт “Джамбібум”, але і музыку, якая падабаецца музыкам-джамбібумаўцам. На прэзентацыі рыхтуецца эксперымент з харэаграфіяй, перформэнсам, сумесным выступленнем запрошаных гуртоў разам з “Джамбібумам”, паказ кліпу на песню “Туман-ярам”.
Пачаткам новага альбома стала песня “Жавароначкі”. Жавароначкі – сімвал вясны, цяпла, сонца, абуджэння. Пра гэта і песня, пра гэта і ўвесь альбом. “Мы пастараліся напоўніць песні цёплай стваральнай энергіяй,”- гаворыць Наста, кіраўнік гурта.
Адназначна вызначыць стыль музыкі гурта досыць складана, бо гэта варыятыўнае сумяшчэнне некалькіх стыляў на фолькавай аснове. Музыку можна аднесці да фольк-мадэрну – сучаснай пераапрацоўцы, пераўвасабленню фолька – ці фольк-fusion, калі на базе фолька змешана шмат розных іншых стыляў, – гэта могуць быць элементы року, джазу, рэгі і г.д. У шматлікіх песнях “Джамбібума” захоўваецца аўтэнтычная манера спеваў, але абрамленне, інструменты, аранжыроўка ўжо сучасныя. Песням уласціва народная прастата, але прастата, якая заварожвае шматгалосным выкананнем.
З аднаго боку, беларусам пашанцавала з тым, што народная песенная спадчына была сабрана ў вялікай колькасці: існуе шмат выдадзеных зборнікаў песень. Аднак яны пыляцца дзесьці на паліцах – і застаюцца незапатрабаванымі. Джамбібумаўцы ж выбіраюць напаўзабытыя народныя песні і напаўняюць іх новай энергетыкай, даюць ім новае жыццё. Але ў альбоме “Жавроначкі” ёсць шэраг вядомых і папулярных яшчэ і ў наш час песень. Таму запрашаем паспяваць іх разам. Вас чакае сонечная сяброўская атмасфера, цікавыя музычныя экперыменты і шмат пазітыву.
Даведкі: 8-029 649 08-88, 766-24-25, 695-86-18
Каса: 8-017 328-66-38/ квіткі ад 12 000 да 20 000
Продаж квіткоў: каса КЗ Мінск, крама “Падземка”, пераход Якуба Коласа
Сувязь з гуртом:
695-86-18
|
